Поради рапидниот технолошки развој и особено со развојот на интернетот и социјалните медиуми, компаниите се исправени пред предизвикот континуирано да се прилагодуваат на тие промени, и да бидат генератори на иновации и нови бизнис модели базирани на технологии, со цел да држат чекор со конкуренцијата на домашниот и меѓународниот пазар без разлика дали се присутни офлајн и/или онлајн на пазарот. Дигиталната трансформација на работењето е од клучно значење за постигнување деловен успех, но и за опстанок во денешното глобално и динамично окружување и во приватниот и во јавниот сектор. За таа цел компаниите треба да применат холистички пристап и успешно да ги имплементираат дигиталните технологии, како и е-бизнис модели и стратегии во работењето. Клучен елемент за реализација на овие стратегиски активности е стручен и компетентен кадар кој ќе може во целост да одговори на овие предизвици. На тој начин бизнис заедницата ќе може соодветно да одговори на предизвиците на дигиталната трансформација која е неизбежна во сите сфери на живеење и работење. Денес компаниите имаат потреба од квалификуван кадар кој е способен да работи во услови на интензивна примена на дигитални технологии и да учествува во пазари со поголема конкурентност и со поголема софистицираност на пазарните механизми, кадар кој ќе биде во позиција соодветно да одговори на предизвиците и проактивно да ги искористи можностите на технологиите и дигитализацијата за да обезбеди конкурентност и подобри организациски перформанси.

Студиската програма по е-бизнис е внимателно структуирана со цел да креира високообразован кадар кој ќе биде способен да се вклучи во процесите на дигитална трансформација во организациите и/или општеството во целина и да ги менаџира предизвиците при воведување на дигитални иновации во работењето. Целта на студиската програма по Е-бизнис е да им овозможи на студентите да се стекнат со продлабочени знаења од областа на е-бизнисот и со специфични дигитални вештини за примена на ова знаење во практиката.

Содржината на предметните програми е усогласена и структуирана според современите предизвици и потреби на општеството за создавање на кадар кој ќе биде способен да ја следи динамиката на глобалната дигитална трансформација и зголемената потреба за водење на бизнисот со помош на дигитални иновации и алатки.

За остварување на овие цели студиската програма ги обработува теоретските аспекти на оваа област, фокусирајќи се и на нивната практична примена. Предметните програми застапени во студиската програма ги прошируваат и продлабочуваат знаењата од областа на е-бизнис низ повеќе потесно специјализирани предмети, кои придонесуваат за посебен образовен профил од областа на е-бизнис (основи на е-бизнис, дигитална економија, информациони технологии, дигитален маркетинг, дигитални иновации, бази на податоци за бизнис, бизнис логистика, менаџмент на бизнис процеси, дизајн и развој на веб, програмирање на бизнис апликации, ЕРП системи, системска анализа и дизајн на информациски системи, аналитика на бизнис податоци, менаџмент на односи со потрошувачи, е-бизнис дистрибутивни канали, маркетинг преку социјални медиуми).