Дипломираниот економист на департманот по менаџмент се оспособува за примена на техники за управување со луѓето и процесите, планирање, деловно комуницирање, управување со финансиите и анализа на инвестициските проекти и сл.

Преку наставата, вежбите, проектните задачи, од понудената литература и софтверот наменет за поддршка на наставата, студентите на оваа програма ќе се стекнат со следниве специфични компетенции:

• Способност за формулирање на цели, мисија и плански активности на претпријатието во современи услови на стопанисување, спроведување на стратегиска анализа, селекција на вистинската стратегија и надминување на проблемите кои се поврзани со спроведување на формулираната стратегија;
• Способност за примена на техниките на квантитативната анализа и истражувања во селекцијата на оптималните бизнис-решенија на полето на производството, финансиите, започнувањето нови бизниси и др.;
• Способност за примена на напредни методи за планирање на потребниот број и структура на вработените, анализа и обликување на работата и работните места, придобивање, селекција, воведување, обука и оценување на успешноста на вработените;
• Способност за ефективно преговарање со цел склучување деловни договори.

Според тоа, работните места на кои овие кадри можат да се вработуваат се компаниите од приватниот и јавниот сектор, јавните установи и јавната управа, граѓанските здруженија и други институции. Позициите за кои тие ќе бидат оспособени вклучуваат:

• Извршни и оперативни менаџери на различни нивоа во компаниите;
• Стратегиски аналитичари и планери задолжени за изработка на инвестицискии студии, стратегиски, бизнис и тековни планови;
• Менаџери и вработени во меѓународните деловни функции на претпријатијата;
• Менаџери и вработени во одделите за човечки ресурси;
• Менаџери и вработени кои ги дизајнираат организациските делови и култура и ги имплементираат организациските промени во претпријатијата;
• Менаџери и вработени задолжени за дизајнирање на менаџмент информационите системи во претпријатијата;
• Претприемачи и сопственици на мали бизниси;
• Директори, раководители или службеници во државни институции, државни агенции, општините и други јавни институции.