Цел на студиската програма по Економија е да им овозможи на студентите да се стекнат со продлабочени знаења од областа на економијата и со специфични вештини за примена на ова знаење во практиката. За остварување на овие цели, студиската програма ги обработува теоретските аспекти на оваа област, фокусирајќи се и на нивната практична примена.
Со усвојувањето на сознанијата на оваа студиска програма, се очекува студентот да ги демонстрира следниве знаења, способности и вештини.
Квалификација која се стекнува: Дипломиран економист на департманот Економија.
1Знаење и разбирање
Поседува знаење и разбирање:
- Како потрошувачите носат одлуки што и колку да консумираат, а фирмите што и колку да произведуваат;
- Како функционираат различните пазарни структури;
- Каде настануваат и како се регулираат ситуациите на неуспесите на пазарот;
- Како се пресметуваат макроекономските агрегати;
- Кои се инструментите на макроекономските политики;
- Кои се факторите на економскиот раст и развој;
- Како функционира пазарот на трудот и кои се причините и последиците од невработеноста;
- Кои се економските аспекти на еколошките проблеми;
- Кои се основните математички, статистички и економетриски модели кои се употребуваат во современата економија.
2Примена на знаењето и разбирањето
Може да ги применува знаењата за да ги идентификува:
- Условите потребни за оптимално функционирање на фирмите во услови на различни пазарни структури;
- Елементите за дизајнирање оптимални модели на државна интервенција за справување со пазарните неуспеси;
- Елементите за дизајнирање соодветни макроекономски политики (фискална и монетарна);
- Дизајнирање политики на пазарот на трудот;
- Елементите на соодветни стратегии за забрзување на економскиот раст и развој;
- Поврзаноста на економскиот систем и проблемите на деградација на животната средина и климатските промени;
- Примена на математички, статистички и економетриски методи за анализа на микроекономските и макроекономските појави и процеси.
3Способност за проценка
Има способност за проценка на користите и трошоците (cost-benefit анализа) на:
- Различните стратегии на фискалната и монетарната политика;
- Различните стратегии за забрзан економски раст и развој;
- Различните политики за подобрување на функционирањето на пазарот на трудот и намалување на невработеноста;
- Различните политики за зајакнување на пазарната конкуренција во економијата;
- Различните мерки за подобрување на условите за иновации и технолошки развој, односно за зголемување на продуктивноста во користењето на ресурсите;
- Различните пристапи во реформите на јавниот сектор со цел подигнување на неговата ефикасност и ефективност;
- Економските политики поврзани со заштитата на животната средина и процесот на декарбонизација.
4Комуникациски вештини
- Стекнува вештини за работа во рамки на истражувачки и проектни тимови;
- Способност за презентирање на научно-истражувачки и проектни резултати пред стручната и пошироката јавност;
- Способност за стручно аргументирање на мислењата и ставовите;
- Разбирање на комуникациските аспекти на бихевиористичкиот пристап во анализата на однесувањето на економските субјекти.
5Вештини за учење
Има развиени вештини за следење и разбирање на новите придонеси во:
- Современата микроекономска теорија и применетата микроекономска анализа;
- Современата макроекономска теорија и применетата макроекономска анализа;
- Дизајнирањето на фискалната политика, монетарната политика и стратегиите на економскиот раст и развој, политиките на стимулирање на иновациите, политиките за заштита на животната средина;
- Применетата економска анализа, односно во квантитативните методи и модели на економската анализа.
