Цел на студиската програма по ФИНАНСИИ е да им овозможи на студентите да се стекнат со продлабочени знаења од областа на финансиите и со специфични вештини за примена на ова знаење во практиката. За остварување на овие цели, студиската програма ги обработува теоретските аспекти на оваа област, фокусирајќи се и на нивната практична примена.

 Со усвојувањето на сознанијата на оваа студиска програма, се очекува студентoт да ги демонстрира следниве знаења, способности и вештини:

 Знаење и разбирање:

• Ги познава институционалната структура на финансиските пазари, карактеристиките на одделните видови финансиски инструменти (акции, обврзници, штедни влогови, заеми, финансиски деривати итн.) и делувањето на различни финансиски институции (банки, осигурителни компании, пензиски фондови, инвестициони фондови, итн.).
• Ги разбира основните принципи на финансиите, суштината на современата портфолио теорија и принципите на вреднување на основните класи на финансиски инструменти: акциите и обврзниците.
• Поседува знаења за најважните видови активни, пасивни и неутрални банкарски работи, за современите методи за управување со средствата, ликвидноста, обврските и капиталот на банките и стекнува способности за анализа на конкретни проблеми од деловната политика на комерцијалните банки.
• Ги разбира и критички ги анализира основните прашања од областа на меѓународните финансии, како што се: формирањето на девизните курсеви и функционирањето на девизниот пазар, главните компоненти на платниот биланс, клучните меѓународни финансиски институции и финансирањето на меѓународната трговија.
• Поседува продлабочени знаења од јавните финансии, ги познава карактеристиките на современите даночни системи, политиките на јавните расходи, буџетскиот процес и стекнува способност да ги анализира ефектите на фискалната политика.

 Примена на знаењето и разбирањето:

• Како финансиски експерт во државните и јавните институции изготвува финансиски планови и учествува во процесот на буџетирање.
• Како финансиски менаџер во нефинансиските трговски друштва учествува во извршувањето на финансиската функција.
• Во банките и другите финансиски институции, извршува различни задачи, поврзани со процесот на управување со ликвидноста, кредитната анализа и управувањето со ризиците.
• Извршува разни работи како финансиски експерт во областа на даноците и јавното финансирање (даночни консултанти, финансиски инспектори), како и во доменот на осигурувањето и царинската проблематика.
• Како експерт за финансиските пазари (берзата на хартии од вредност, брокерски друштва и сл.), спроведува фундаментална и техничка анализа, прави проекции на идното движење на финансиските варијабли итн.

Способност за проценка:

• Покажува способност за собирање, обработка и интерпретација на информациите за појавите во финансиската економија.
• Покажува способност за оценка и избор на научни теории кои во своите рамки даваат одговор и препораки за движењето на финансиските појави во иднината.
• Покажува способност за избор на најповолна насока на дејствување во рамките на финансискиот систем (фискалната политика, монетарната политика, финансиските институции).

 Комуникациски вештини:

• Способност за комуникација каде темата на дискусија е од областа на финансиите и спремност критички и објективно да се изнесуваат аргументи во процесот на финансиското одлучување и дејствување.
• Самостојно учество во специфични, научни и интердисциплинарни дискусии, со професионален пристап.
• Способност за комуникација со професионалци од својата и од други научни дисциплини, каде критериумите за донесување на правилна одлука не се јасно дефинирани или се базирани на субјективни мислења.

 Вештини на учење:

• Демонстрира совладани вештини за учење – концентрација, читање и слушање, меморирање, користење на времето.
• Демонстрира способност за разумна оцена на идеи со критичко размислување, истражува стратегии (и ставови) за генерирање идеи со креативното размислување.
• Ефикасно ги користи овие размислувања и стратегии за решавање на секојдневните проблеми.

Квалификација која се стекнува: Дипломиран економист на департманот Финансии.